Ojúde Ọba: Ìjọba àpapọ̀ fẹ́ kí àjọ UNESCO fòntẹ̀ lù ú – The Nation Newspaper
By Kayọde Ọmọtọṣọ
Gbogbo ọna ni ijọba apapọ yoo tọ lati jẹ ki ajọ agbaye, iyẹn UNESCO, fontẹ lu ayẹyẹ Ojude Ọba, ti wọn n ṣe niluu Ijẹbu, nipinlẹ Ogun, gẹgẹ bii kan lara awọn ayẹyẹ to gbajumọ lagbaaye. Minisita fọrọ aṣa, iṣe ati idagbasoke ọrọ aje to jẹ mọ iṣẹ ọpọlọ (creative economy), Hannatu Musa-Musawa, lo sọ eyi di mimọ lanaa, ọjọ Iṣẹgun, Tusidee. Gẹgẹ bo ṣe fọ, o ni ayẹyẹ yii ba afojusun Aarẹ Bọla Ahmed Tinubu mu pẹlu bo ṣe n gbero lati mu alekun ba iye owo ti ijọba n pa wọle ni ẹka irinajo afẹ, ko si di bii ọgọrun-un biliọnu Dọla ko too di ọdun 2030.
Minisita ọhun ti adari kan nileeṣẹ naa, Ben Ugo-Anama, ṣoju fun, sọrọ yii nibi ayẹyẹ Ojude Ọba tọdun yii ti wọn ṣe ni gbọngan Awujalẹ, to wa niluu Ijẹbu-Ode.
Tẹ o ba gbagbe, ni gbogbo ọjọ kẹta ọdun Ileya ni wọn maa n ṣayẹyẹ ọdun Ojude Ọba yii. Akọle tọdun yii ni; “Ojude Ọba: Iṣọkan ati irẹpọ; ẹbun wa”. Minisita ọhun ṣapejuwe ayẹyẹ yii gẹgẹ bi ọna kan lati mu iṣọkan ba orileede Naijiria, to si tun le mu idagbasoke ba eto ọrọ aje ilẹ wa debii pe afojusun wa ko ni i jẹ epo rọbi nikan mọ.
Minisita ọhun ni lai naani bi ọdun yii ṣe gbajumọ to kaakiri agbaye, ajọ UNESCO o ti i fontẹ lu u, atipe oun ti pinnu lati bẹrẹ igbesẹ lori rẹ, ki ajọ ọhun ba le fontẹ lu Ojude Ọba.
Ninu ọrọ ti Gomina Dapọ Abiọdun ti ipinlẹ Ogun sọ nibi eto ọhun lo ti ni ayẹyẹ yii ti jẹ ki ilu Ijẹbu ati ipinlẹ Ogun o gbajumọ kari aye. O ṣeleri lati ṣiṣẹ pọ pẹlu ijọba apapọ, ki ajọ agbaye ba a le fontẹ lu ọdun naa.
Lara awọn eeyan pataki to wa nibi ayẹyẹ yii ni awọn gomina tẹlẹ nipinlẹ Ogun, Arẹmọ Oluṣẹgun Ọṣọba ati Gbenga Daniel; Igbakeji gomina, Nọimọt Salakọ-Oyedele; Sẹnetọ Shuib Salis, to n ṣoju aarin gbungun ipinlẹ Ogun, Abẹnugan ileegbimọ aṣofin ipinlẹ Ogun, Daisi Elemide; iyawo igbakeji gomina ipinlẹ Ondo, Abilekọ Abọsẹde Adelami; iyawo aarẹ ilẹ wa tẹlẹ, Abilekọ Bọla Ọbasanjọ; Oluṣiro-owo agba nilẹ wa, Abilekọ Oluwatoyin Madein, atawọn mi-in.
